معظم كتب التاريخ اللي ببتناول تاريخ مصر بتبدأ بتاريخ الاسرات وعم مينا لكن في عصر ماقبل الاسرات لان الحضاره المصريه موجوده من 250 الف سنه قبل الميلاد
و العصر اللي اكتشف فيه المصري القديم النار والحجر الصوان ودي اكتشافات لايستهان بها لانها كانت طريق المصري القديم للمدنيه والاستقرار والصناعه بعد كده
كان عمنا المصري القديم راجل بدائي يتنقل بحث عن المم (المم دي فرعوني علي فكره متضحكوش ) وبعد حصل التصحرمن 35 الف سنه قبل الميلاد(العصر الحجري الحديث والتغيرات المناخيه) ومبقاش في مطر وبالتالي مفيش نباتات وبالتالي مفيش حيوانات وبالتالي مفيش مم فالراجل المصري القديم طول عمره اروبه قام قال ههاجر من الجنوب واتجه للوادي والدلتا
واكتشف نهر النيل ومن نهر النيل عرف الاستقرار لانه الميه موجوده علي طول هيتنقل ليه كف الله الشر
ولما عرف انه هيستقر ملقاش كهوف طب يعمل ايه بني الاكواخ وعرف الزراعه وربي الحيوانت والطيور
ومنها ظهرت المجتمعات الزراعيه وحضارات ماقبل الاسرات
اللي هي حضارات ماقبل الاسرات من 4500-3200 ق.م وهي :
1_مرمده بني سلامة
وهي موجوده في الدلتا (بالقرب من الخطاطبه) وتبع مركز امبابه واهلها كانوا بيفضلوا يعيشوا علي ضفاف المستنقعات واستخدموا النبات الكثيفه كمصدات للهواء والاتربه
وعرفوا الرعي وتخزين الغلال في صوامع من القش او الحصير وكمان عرفوا النسيج وصناعه الكتان وكانوا بيسكنوا في اكواخ امتازت بطراز معماري خاص بيضاويه الشكل وقليله الارتفاع وفي كل كوخ في المنتصف تلاقي اناء (طشت بالبلدي كده بس محفور في الارض ) وده عشان يجمع ميه المطر اللي بتنزل من الثقف المصنوع من القش (حد يقولي مطر ايه مش هما علي النيل بيجموا المطر ليه اقوله عشان ناس نضيف بيتهم يبقي مستنقع يعني هههههههههه) وكمان في كل بيت مخزن للغلال علي شكل سله ضخمه من الحصير او القش وكمان كانت البيوت في صفوف مستقيمه بين كل صف شارع وكانوا بيدفنوا الموتي تحت ارضيه المساكن بتاعتهم عشان كده
تأريخ الحضاره وتميزها كان سهل علي عكس حضارة الفيوم
قطع خشي الصفصاف ترجع الي عصر مرمده بني سلامة
2_حضاره الفيوم
غرب نهر النيل (الفيوم بتاعتنا لتفتكروا اني اقصد فيوم تانيه ) مفيش معلومات كافيه عن الحضاره دي لان
ملقوش اي جثث لانهم تقريبا كانوا بيدفنوا الجثث في مكان بعيد (حد يقولي كانوا بيحرقوها اقولك الله اعلم بس احتمال بعيد لان المصرين عرفوا البعث والخلود من قبل الاسرات وكانوا بيحافظوا علي الجثث عشان لما الروح ترجع تلاقيها سليمه عشان كده ابتدعوا التحنيط ) ولكن تم التعرف علي حضاره الفيوم من الفخار اللي وجده الباحثين هناك
شواطئ 10 وحضاره الفيوم
3_ حضاره تا سا :
او كما عرفت دير تاسا
وهي قريه صغيره بتقع علي الضفه الشرقيه لنهر النيل مركز البداري في محافظه اسيوط ناس شايفه ان الحضاره دي هي وحضاره البداري واحد ولكن حضاره تاسا سبقت البداري لان كل تاسا تنتمي للعصر الحجري
اما البداري فعرفوا النحاس ووجدوا فيها(تاسا اقصد) فؤس حجريه وكؤس حجريه واخده شكل زهره وادوات زينه عباره عن خرز مصنوعه من الصدف او العاج او العظم
واهم ميزه ميزه دير تاسا صناعه الفخار الاسود وهو نوع راقي من الفخار وتميزوا ايضا بطرق الدفن
وكانت المقبرة عبارة عن حفرة برميلية بالطول ويكفن المتوفي فيها بلفائف من الجلد أو الكتان أو الحصير (ده تبع حالته الماديه والاجنماعيه بيتحدد بيكون ملفوف في ايه)وبيدفنوا معاه اواني فخار مع بعض الأدوات التي كان يستخدمها في حياته وبعض الحلي وأدوات الزينة ويرقد علي جانبه الأيسر في هيئة انثناء أو القرفصاء(برضه فكره البعث والخلود وبذره وتمهيد لعلم التحنيط)
4_ البداري
قلنا انها قريه في الضفه الشرقيه للتهر محافظه اسيوط وقلنا كمان انها عرفوا النحاس وده ميزها عن دير تاسا وتقدمت صناعه الفخار وعرفوا الفخار الاحمر والاحمر المطفي وذو العنق الاسود وتقدم الصناعه في حد ذاتها ومصنوعات عاليه الجوده وكمان اهتموا بالحلي فهنلاقي عندهم العقود و الأساور وألوان من القماش المطرز والاكاليل لزينة الشعر وأحزمة وأقراط . واهم حاجه ميزه البداري انهم عرفوا البعث والخلود عشان كده كانوا بيلفوا الموتي بالحصير او جلد او كتان ويدفنوه
مع نسائه والطيور وحيواناته المحببه وبعض التماثيل (فكره متقدمه للحافظ علي الجثه ومرحله لظهور التحنيط لظهور علم التحنيط )
تمثال يرجع الي حضاره البداري
5_حضارة نقادة:
وتقع في الصعيد علي الضفه الغربيه لنهر النيل وكان سكان هذه الحضارة عرفوا اللبن(الطوب الاخضر او الني اللي تعرفوا منهم واحد اللي كان بتتبني منه البيوت زمان في الارياف ) فبدؤ يدعمون به جدران القبور وكانوا بيدفنوا مع الميت في قبره الطعام والشراب والمتاع .(برضه فكره البعث والخلود والحياه الاخره والحفاظ علي الجثه وخطوه متقدمه لظهور التحنيط )
والعلماء بيقسموا حضارة نقادة لحضارتين
ا _نقاده الاولي(العمره) : تلت حضاره البداري
2_نقاده الثانيه(جزره): وهي متقدمه عن نقاده الاولي لان كان فيها صلات تجاريه وعلاقات خارجيه وده عرفوه العلماء من استخدامهم للازورد اللي بيوجد في اسيا
الي جانب تقدم الزراعه وزياده الرقعه الزراعيه وده بسبب ارتفاع منسوب مياه النيل فالنهر نشط تحت مجراه وبدء يعمق المجري وده له اثر واضح في اختفاء المستنقعات
لان المجري بقي بستوعب المياه فمطفش علي الجوانب مكونه مستنقعات
والمقابر والبيوت في العصر ده بتاكد ظهور فئات مختلفه وطبقات وده لان محتوايا المقابر وكمان طراز البيوت ومحتوايها بيختلف
وتعتبر حضاره نقادة اكثر حضارات ماقبل الاسرات تقدم نظرا لتقدم الفن والتقدم الاقتصادي متمثلا في العلاقات الخارجيه واتساع الرقعه الزراعيه واستخدام خامات غير محليه وتقدم الصناعه حيث ظهرت صناعات متعدده زي الادوات المنزليه والحلي وظهر الذهب والفضه وزاد استخدام النحاس في حضاره جزره وصنع منه الازميل والخناجر والحراب
راس صولجان ترجع الي حضاره نقادة
اواني فخاريه وتماثيل مرمر ترجع الي حضاره نقادة
6_ حضاره المعادي:
المعادي في الاول كانت مركز بيصب فيه النحاس اللي بيجي من شبه جزيره سيناء ولكن بعد نجاح المصرين في تجفيف المستنقعات وقطعوا البوص وقضوا علي الحيوانات المفترسه فعمروا المنطقه وسكنوها حضارة المعادى مرتبط بموقع المعادى ، حيث عثر هناك على بقايا عمرانية كبيرة تتكون من أكواخ ذات شكل بيضاوي مفتوح من الجهة الجنوبية الغربية يحيط بها قوائم خشبية من جذوع الأشجار رشت حولها أغصان الأشجار الدقيقة ، والتي كست القوائم من الخارج بطبقة من ومش عارفين اذا كانت الاكواخ دي لها ثقف ولا ملهاش رغم أن العرض الرئيسي منها هو حماية أهلها من الرياح الشمالية الباردة شتاءا
والطراز المعماري لمساكن المعادي واحد، الموقد قرب المدخل ، وبجواره اناء كبير لحفظ الماء ، واواني أخرى لخزين الغلال وأنواع الطعام وقد حفرت لتلك الاواني حفراً عميقة في التربة الرملية وإلى جانب ذلك فقد استخدمت بعض المخازن التي كانت عبارة عن حفر عميقة توضع بها بعض الاواني الفخارية الصغيرة (عشان متكسرش).
الطراز المعماري
وللآواني الفخارية بالمعادى ميزات خاصة تجعلها عن الأنواع المعروفة في مصر ما قبل التاريخ بعضها حمراء اللون ذات شكل مستطيل وقاعدة خفيفة وبعضها سوداء اللون ذات شكل كروي لها قاعدة ملساء وكلها مصنوعة باليد ، بما في ذلك الاوا ني الكبيرة علي الرغم من حجمها الضخم .
شكل الاواني الفخاريه
سكان المعادى كانوا عارفين فوائد المعادن ومزاياها في صنع الآلات المختلفة ومن ثم وجد مثقاب(شنيور ) من النحاس له مقبض من العظام كما وجد سلاح يشبه الأزميل صنع من نفس المعدن . والباحثين شايفين أن النحاس مجلوباً من شبة جزيرة سيناء كمان الآلات النحاسية التي عثر عليها في وادي غرابة تشبةالالات اللي وجدت في المعادى وده دليل على وجود تبادل تجارى بين المنطقتين .
· وقد اعتقد سكان المعادى في البعث بدليل دفن الأثاث مع الموتى مثل الأواني الفخارية وأدوات الزينة والصيد وكمان دفنوا بعض الحيوانات المقدسة
ومن اللي فات ده كله لازم نعرف حاجه مهمه ان الزراعه هي السبب الاوحد والرئيسي اللي ادي الي استقرار المصري القديم وتكوين مجتمع محلي تطور بعد ذلك
تكوين مجتمعات اكبر لتشمل الوجه البحري والوجه القبلي (مملكه الشمال وومملكه )
ثم تكوين الوحده بين شطري البلاد وبدء عصر الاسرات
والزراعه كمان هي اللي جعلت المصري القديم يتابع النيل ويراقب الفيضان ومن هنا ظهر التقويم فقسم السنه الي ثلاث فصول فصل الفيضان وفصل الزراعه وفصل الحصاد
وحدد التقويم 365 يوم والسنه12 شهر والشهر 30يوم وخمس ايام اعياد والنظام ده هو اللي فضل في مصر لحد وصول الرومان واول تقويم ظهر في الدلتا قبل الاسره الاولي بالف عام الزراعه كمان هي اللي وصلت المصري القديم الي صنع الالات وادوات الزراعيه وبالتالي تقدم الصناعه كمان الزراعه والكتان هما اللي عرفوا المصري صناعه
الكتان وتخزين الغلال
الرئيسية 
أحدث الصور 
الثلاثاء مايو 01, 2012 5:38 pm