حارس مصر ( المشهدالرابع )

المشهد الرابع

(زنزانة كبار الزوار)
*****مشهد دخولة الزنزانة يجدها زنزانة فخمة مفروشة موكيت وبيها ورد وكل الكماليات ******
وكل واحد قاعد منهم معاة لاب توب ... وقاعد على مكتب وعلم مصر قدامة ......ولابس بدلة كاملة ..... وبيتكلم فى الموبايل
ساعة دخولة ياتى لة ذهول ويتسمر مكانة ..... فينظروا الية ويقولوا انت مين *********************

هريدى : انا هريدى عبد العال هريدى من العمور مركز المراغة محافظة سوهاج ...... وجاى هنا علشان اخدمكم ... بس انا مش مصدق عينية اية اللى مقعدكم هنا قوموا يلا اقعدوا مكان المامور

جمال مبارك : اية الاهبل اللى جايبنهولنا دة

هريدى : لا ياباشا الكلام ساهل لكن الفعل صعب ..... انا مش مصدق عينية البهوات دى كلها محبوسة هنا

صفوت الشريف : والله هنا احسن ...... انت عاجبك اللى بيحصل برة على الاقل هنا امان

فتحى سرور : اة احنا هنا فى فترة نقاهة ..... ومريحين دماغنا خليهم هما يتعبوا شوية علشان يعرفوا احنا كنا بنتعب قد اية

هريدى : ينظر لاحدهم ويقول ..... يا وقعة سودة ... دة الباشا بتاعنا ..... دا لما كان بيجى عندينا .... كان الباشا بتاعنا رجلية تخبط فى بعضيها .... وكنا نلم نص المحافظة والنص التانى نخلية فى الشارع يهيص ويصقف ويقولوا لا لا لا الكباب واللى جاب الكباب

**ينظر لواحد تانى ويقول لا لا مش مصدق نفسى ويفرك فى عينية

جمال مبارك : لا كل شىء معقول .... ما الفيس بوك خربها وقعد على تلها

هريدى : مش انت يا باشا ابن الباشا الكبير قوى ..... دانا كنت واقف مرة على الطريق خدمة وانت بتعدى .... روحت شورتلك شوفتنى

جمال مبارك : لا ماخدتش بالى .... اصل كنت مشغول فى الاب توب بخلص فى صفقة

هريدى : دانا ساعتها اخدت قلم من الظابط بتاعنا .... وقلى يا ابن الكلب ازاى تشاور لسيدك .... انت هنا علشان تحرسة وبس .... اوعى تعمل كدة تانى لاقطعك ايدك
والباشا الكبير عامل اية بالوقتى

جمال مبارك : كويس

هريدى : امال كل مابشوفة فى التليفزون مستموت قوى ونايم كدة مش ناقص غير يعملها علينا

جمال مبارك : لا دة كدة وكدة علشان الحسد

هريدى : مش دة اخوك اللى قاعد جنبك

جمال مبارك : اة انت تعرفة

هريدى : ايوة طبعا .... كنت بشوفة فى ماتشات الكورة هو وبيشجع مصر
بس انا مستغرب ازاى يشجع مصر .... وابوة واخوة عايزنها تنهزم

جمال مبارك : لا مش كدة .... هو كان بيشجع قدام الناس زينا كلنا .... لكن لما الاستاد كان بيفضى والجماهير تروح والنور يطفى كنا بنستفرد بيها ... وتقعد تعــــــــــــــــيط .... وتقول ارحمونى ...وتبوس فى ادينا بس مكناش بنرحمها ......علشان تبقى جامدة وقوية وتتحمل

هريدى : اه كدة انا فهمت ...... ممكن اطلب منك طلب ياباشا

جمال مبارك : من اولها دانت طماع قوى ..... اقول ياسيدى

هريدى:كنت عايزك توصى الباشا اللى جنبك ..... عايز كام طن حديد ابنى حتة البيت اللى انا قاعد فية علشان الحق اتجوز قبل ما شطب بنزين

احمد عز: اية انت ما تعرفش مش انا بطلت

هريدى:بتقول اية يا باشا ( طبلت )

احمد عز : والله كان احسن من اللى انى فية بالوقتى ..... دا حتى الصاجات بتوعى خدوها منى ....... وقالولى من اين اتى لك هذا

هريدى:وانت قولتلهم اية

احمد عز :قولتلهم من ميمى الرقاصة ...... ومصدقونيش بردة

هريدى :لية

احمد عز : قالولى يا سيدى دول مش بتوع ميمى .... دول بتوع سوزى

هريدى : منور يا معلم

فتحى سرور: الله يخليك

هريدى : عارف يا باشا انت الوحيد اللى كنت عاجبنى

فتحى سرور : واشمعنا انا يا سيدى

هريدى : اصلة انت كنت بتفكرنى بمدرس الحساب الله يجازية اللى خلانى اخدت ملحق

فتحى سرور :بفكرك لية بية

هريدى : علشان كان يخش الفصل ويكتب المسائل على السبورة من غير ما يشرحها .... ويقول فاهمين ..... نروح احنا على طول نقول موافقة من غير ما نفهم حاجة

فتحى سرور : طيب ماالعيب فيكم حاجة .... مش فاهمنا توافقوا لية عليها

هريدى:اصلة كان معاة خرزانة فقرية .... زى الشاكوش بتاعك بالظبط .... يقول فاهمين من هنا وهى تنزل على التختة بتاعتة من هنا ..... وعلى طول يقول طلعوا الكراريس علشان تكتبوا الدرس ورفعت الجلسة

....... والباشا ابو نضارة دة مش هو بردة
اللى كان زمان فى التليفزيون *********

صفوت الشريف : لية هو انت بتتفرج على التلفيزيون بتاعنا ولا اية

هريدى: بصراحة يا باشا برامجكم كانت غلسة ايامها ولغاية بالوقتى وماكنتوش فالحين غير تيجبولنا مازنجر وكابتن ماجد ..... وبعد ما كبرنا قولتلنا ان الريس بتاعنا هو مازنجر وماحدش يقدر يوقف قدامة واسالوا ايمن نور ....... وكابتن حسن شحاتة هو بعينة كابتن ماجد لما كبر .... وشوفت اخدنا بية كام بطولة ورا بعض ..... بس انا مستغرب ازاى كل البطولات دى وما نلعبش فى كاس العالم

صفوت الشريف : اصلة كابتن ماجد متصور فى القنوات الاقليمية ومش بيشتغل غير على النايل سات

هريدى: بس يا باشا انا سمعت انك سيبت التلفزيون وبقيت حاجة كدة ...... خيال ماتة كبير قوى فى البلد

صفوت الشريف : اة انا كنت الكل فى الكل

هريدى: بس انا مستغرب يا باشا عليكم كنتوا ازاى بتناموا ويجليكم نوم وعمالين تسرقوا فى البلد وشايفين الدنيا خربانة ولا هممكم وكل يوم مؤتمرات وافلام هندية تعملوها ...... طيب احنا كنا بنصدق كدبكم
طيب وانتم كنتوا بتصدقوا كدبكم على نفسكم ازاى

صفوت الشريف : بص يا حبيبى دة كان اكل عيشنا ..... وشوف انت لما تلاقى وتحس ان قدامك 90 مليون مغفل مصدقينك ويصقفولك ولما يشوفوك عايزين يشولوك من على الارض ويشولوك على اكتافهم ويقولوا الشريف الشريف

هريدى: عارف يا باشا الشريف شريف بفعلة وعملة والنبى علية الصلاة والسلام برىء منك ومن امثالك ليوم القيامة

**** فجاة ياتى عسكرى السجن : السيد جمال وعلاء مبارك زيارة
السيدة سوزان مبارك

هريدى: هية جاية تفتح مكتبة فى السجن ولا اية

*** تدخل سوزان مبارك

سوزان : عاملين اية يا اولادى يا احبابى

جمال وعلاء : الحمد لله يا ماما ............ بابا عامل اية

سوزان : زى الفل ما تعلوش همة .............. خليكم انتم فى نفسكم

جمال مبارك : هو لسة ما فاقش من الغيبوبة

سوزان : لا امبارح فجاة كدة قام نص قومة وبص علية وقاللى ................. روحى منك لله انتى وابنك ضيعتونى وضيعتوى تاريخى كلة حسبى الله ونعم الوكيل فيكم

سوزان : المهم فى حد غريب هنا

جمال : لا مفيش حد ...............هريدى مننا وعلينا

سوزان : طيب اسمعوا كلة تمام والدنيا خربانة برة مفيش بوتجاز ولا بنزين ولا سولار وقريب خالص مش هيلاقوا اللقمة اللى بياكلوها علشان يتربوا ويعرفوا ان الله حق وان اللى عاملوة مع سيادهم لازم يدفعوا حسابة والحساب تقيل قوى واللى جاى اتقل وهنشوف احنا ولا هما
انا خليت مصر مولعة نار وبتاكل مع بعضيها الثوار بالوقتى واقعين مع الجيش والاخوان والسليفين فى حياتهم ما هيتفقوا والبورسعايدة واقعين مع متارسة الاهلى والزمالك ...والسويس ولعت واسكندرية البلطجية هناك هما الحكومة والقاهرة بالوقتلى الشديد وحيلة وسينا خلاص مابقاتش لينا بقت للبدو والصعايدة ثورتهم قامت بعد الثورة وبياكلوا فى بعض ومفيش حاجة مضايقاهم غير قطورة السكة الحديد اللى هما بيركبوها ودول الخليج بتشترى وتبيع فيهم
انتوا مش كل شوية تسمعوا عن اللهو الخفى

هما : اة

سوزان : انا .............. بس ما تقولوش لحد

هما : فى حد عارف غيرنا

سوزان : كتير قوى

هما : وهما عارفين الناس دى

سوزان : لا انا تلميذة دا شغل مخابرات

هريدى : بس كفايكى انتى لسة ما تهدتيش دة صدق المثل اللى قال لومغلباك بلد سلط عليها مرة
دا المفروض كان كل دول طلعوا وحطوكى انتى فى الزنزانة بدالهم
بس حنعمل اية الله يجازى الى كان السبب وطلعك من السجن

سوزان : يا حبيبى انا ماحدش يقدر يسجنى كل دول اللى برة انا معاية ملفات توديهم ورا الشمس

هريدى: واخرتها اية صدقينى الكلام خلص انتى المفروض تشوفيلك بلد خابزة تروحى تقضى اليومين اللى بايقنالك على الدنيا دانا سمعت انى مفيش ولا دولة عايزاكى دا حتى السودان اللى كلها مشاكل مش عايزانيك وقالولك كفاية اللى احنا فية احنا مش قادرين على الجنوب هنقدر عليكى

*** يدخل عسكرى السجن ويقول الزيارة انتهت

سوزان : طيب عايزين حاجة يا حبايبى

جما ل وعلاء : لا سلام ياماما


هريدى : ينظر لاحدهم هوة الباشا الكبير معانا كمان دانا لسة شايفة

احمد نظيف : انت كمان ماتعرفنيش ولا اية

هريدى: ازاى ... وهل يخفى القمر .... دانتا اكتر واحد عارفك دانا مرة سالت عليك .... قالولى داخد اجازة عقبال امالتك راح يتجوز .... قلت يا بختك عقبالى يارب ....وقلت فى نفسى بردة الحكومة تروح تتجوز وتسيب الشعب كدة يخبط .... بس اللى انا مستغربلة يا باشا .... وقعوا فيك ازاى ..... الطول بسم الله ماشاء الله اللهم لا حسد .... دا كان الباشا بتاعنا والباشا الكبير لما يقفوا جنبك فى عيد الشرطة ..... قصدى فى عيد الثورة ....متقولش دول عيالك وانت ابوهم .... كانت حاجة كدة هيبة ..... اة صحيح ما لازم اكبر راس فى الحكومة تكون كدة .... ماهية دى الخوازيق اللى بحق وحقيق .... حاجة كدة تشرح القلب ... وسمعت ياباشا انة جالك مولود جديد اليومين دول ..... ربنا يخلهولك كدة سميتة اية

احمد نظيف: سميتة خالد سعيد

هريدى: واشمعنا الاسم دة

احمد نظيف : لية انت ما سمعتيش عن كلنا خالد سعيد .............اللى خربت بيوتنا

هريدى: وحتى انتوا هتسموا خالد سعيد

احمد نظيف : ماهى دى الديمقراطية اللى احنا اقعدنا نعلمهالكم بس انتوا يا خسارة ماتعلمتهاش

هريدى : مش فاهم ياباشا ازاى يعنى

احمد نظيف: يعنى تقتل القتيل وتسمى ابنك باسمة

هريدى: ياة يا باشا دانتوا عايزين كدة تخلفوا 90 مليون .... علشان تسموا كل واحد منهم باسم واحد مصرى ...... يمكن ساعتها نسامحكم
بس يا خسارة لو احنا سمحناكم .....اكيد ربنا مش هيسامحكم فى الاخرة على اللى عملتوة فينا .... لانة حكم عدل وانتم ماعدلتوش ....انت ما سمعتش قولة تعالى
بسم الله الرحمن الرحيم
( فلما نسوا ما ذكروا بة فتحنا عليهم ابواب كل شىء حتى اذا فرحوا بما ا وتوا اخذناهم بغتة فاذا هم مبلسون * فقطع دابر القوم الذين ظلموا والحمد لله رب العالمين )
صدق الله العظيم
الانعام اية 44 ))
والسلام عليكم ورحمة الله وبركاتة